ភ្នំពេញ៖ រឿងឧកញ៉ាដីឡូត៍មួយចំនួនកំពុងតែ អាសោចកេរ្តិ៍ឈ្មោះផ្ទុះរឿងមិនចេះចប់ហើយក៍ត្រូវបានឃុំខ្លួនជាបន្តរបន្ទាប់ផងដែរ ចំណែកម្ចាស់ក្រុមហ៊ុនបុរីនិងដីឡូត៍ខ្លះក៍ខិតខំប្រឹងប្រែងស្វែងរក គោរមងារ ជាឧកញ៉ា ដើម្បីងាយស្រួលក្នុងការរកសុីផ្នែកអចលនទ្រព្យ ។
យោងតាមសម្តីពីអតិថិជន២នាក់ដែលបានផ្តល់ព័ត៌មានមកអង្គភាពសារព័ត៌មានយើងខ្ញុំកាលពីរសៀលថ្ងៃទី២២ខែឧសភាឆ្នាំ២០២៣ ដោយសារតែពួកគាត់ទ្រាំនឹងពាក្យភូតកុហក់សន្យាខ្យល់ម្តងហើយម្តងទៀតរបស់លោក ហ៊ុន ចំរើន អគ្គនាយកក្រុមហ៊ុន មង្គលលែន រៀលធី ឯ.ក និង លោកស្រី ឡុង មុីមុី អគ្គនាយិកា ដំណាងឲ្យក្រុមហ៊ុន មង្គលលែន ហើយក៍ត្រូវជាភរិយារបស់លោក ហ៊ុន ចំរើន ថានឹងប្រគល់ប្លង់រឹងឲ្យ តែមិនឃើញប្លង់បានត្រឹមពាក្យភូតកុហក់និងសន្យាខ្យល់។
ដើមចមនៃការទិញដីឡូត៍របស់លោក ហ៊ុន ចំរើន អតិថិជនម្នាក់ក្នុងចំណោម២នាក់ បានរៀបរាប់ប្រាប់ថាដោយសារតែលោក ហ៊ុន ចំរើន បានពន្យល់ពីសក្តានុពលមានការអភិវឌ្ឍន៍ក្នុងគម្រោង ហើយបានលួងលោមរូបគាត់ឲ្យទិញទៅទុកគ្រាន់ចំនិញដោយបានណែនាំប្លង់ល្អៗក្នុងមួយឡូត៍ត្រឹមតែ $5700 ហើយការបង់ប្រាក់ងាយៗគ្រាន់តែកក់$500ដើម្បីបិតឡូត៍តែប៉ុណ្ណោះ ហើយទីតាំងដីនៅមិនឆ្ងាយនោះទេដែលស្ថិតនៅភូមិ ស្តុកក្រោល ឃុំ វាលពង់ ស្រុក ឧដុង្គ ខេត្ត កំពង់ស្ពឺ។
ដោយជឿទុក្ខចិត្ត អតិថិជនម្នាក់ក្នុងចំណោម២នាក់ខាងលើក៍ព្រមកក់ប្រាក់$500លើកទី១នៅថ្ងៃទី២៦ខែតុលាឆ្នាំ២០១៩ និង កក់លើកទី២ចំនួន $2500 នៅថ្ងៃ២៨ខែតុលាឆ្នាំ២០១៩ ប្រាក់ដែលនៅសល់ចំនួន$2700បង់រំលស់សុទ្ធមួយខែ $100 ចំនួន៣០ខែដោយគ្មានការប្រាក់ ហើយក្រុមហ៊ុន មង្គលលែន សន្យានិងចេញប្លង់ឲ្យរយៈពេល៧ខែក្រោយ បន្ទាប់ពីបង់ប្រាក់ផ្តាច់ ។
តែជាអកុសល អតិថិជនខិតខំរកប្រាក់មកបង់ឲ្យក្រុមហ៊ុន មង្គលលែន យ៉ាងលំបាកបើទោះបីកាលនោះជួបនូវ វិបត្តិជំងឺឆ្លងដ៏កាចសាហាវ កូវីត-១៩ យ៉ាងណាក្តីក៍គ្នាតស៊ូបង់រហូតទំរាំបង់ផ្តាច់ សង្ឃឹមថានឹងបានប្លង់ដីមួយឡូត៍ តែបែរជាទទួលបានការខកចិត្តម្តងហើយម្តងទៀត ដោយលោក ហ៊ុន ចំរើន និង លោកស្រី ឡុង មុីមុី បានព្យាយាមពន្យាពេលភូតកុហក់ជាច្រើនលើកច្រើនសារធ្វើឲ្យរូបលោកជាអតិថិជនអស់ទំនុកចិត្តដេកក៍ដេកលែងលក់ដែរ។
អតិថិជនម្នាក់ទៀតបានរៀបរាប់ប្រាប់ថាលោក ហ៊ុន ចំរើន ក៍បានណែនាំគាត់ឲ្យទិញដីឡូត៍នៅគម្រោងអភិវឌ្ឍន៍ដីឡូតិ៍លំនៅដ្ឋាន (មរតក) ស្ថិតនៅភូមិ វាលទន្សាយ ឃុំ មានជ័យ ស្រុក ឧដុង្គ ខេត្តកំពង់ស្ពឺ ចំនួន២ឡូត៍ក្នុងតម្លៃ $6000 ។
ក្រោយមកលោកបានដឹងថាគម្រោងមួយនេះដូចជាមានបញ្ហាក៍ទៅសួរក្រុមហ៊ុន ?
លោក ហ៊ុន ចំរើន បានប្រាប់ថាគម្រោងនោះកំពុងតែប្តឹងផ្តល់គ្នា ក៍សំឲ្យអតិថិជនរូបនេះផ្តូរដីដែលបានទិញ២ឡូត៍មកកាត់យកត្រឹមមួយឡូត៍ក្នុងគម្រោង មង្គលលែន រៀលធី ឯ.ក ដោយលោក ហ៊ុន ចំរើន ជាអគ្គនាយកក្រុមហ៊ុនផ្ទាល់ ហើយលោកក៍បានយល់ព្រមទទួលកាត់កងដោះដូរដោយមានឯកសារលើលិខិត កិច្ចសន្យាលក់ដី ដែលស្ថិតនៅភូមិ ស្តុកក្រោល ឃុំ វាលពង់ ស្រុក ឧដុង្គ ខេត្ត កំពង់ស្ពឺ ក្នុងតម្លៃ $6000 ហើយក្នុងលិខិតក៍បានបញ្ជាក់ដែរថាអតិថិជនខាងលើនេះបានប្រគល់ប្រាក់គ្រប់ចំនួន $6000 នៅថ្ងៃទី៣១ខែមិនាឆ្នាំ២០២១។
នៅក្នុងកិច្ចសន្យាលក់ដី លេខ ០០១១៣៧ ក៍បានបញ្ជាក់ថា ភាគីលក់សូមសន្យាថាក្រោយពីទទួលប្រាក់ហើយមិនកែប្រែតម្លៃឬប្រែថាមិនលក់ឡើយ បើការអនុវត្តន៍ផ្ទុយពីនេះខ្ញុំបាទ/នាងខ្ញុំសុខចិត្តសងប្រាក់១x២ដងនៃប្រាក់កក់កន្លងមក ម្យ៉ាងវិញទៀតបើថ្ងៃក្រោយមានជនដទៃណាទោះក្នុងគ្រួសារឬក្រៅគ្រួសារមកតវ៉ាដីនេះជាសម្បត្តិរបស់ខ្លួនខ្ញុំបាទ/នាងខ្ញុំសូមទទួលខុសត្រូវទាំងស្រុងចំពោះមុខច្បាប់ជាធរមាន ក្រែងពុំពិតដូចពាក្យខាងលើយើងខ្ញុំសូមផ្តិតមេដៃទុកជា ភស្តុតាង។
អតិថិជនទាំង២នាក់បានប្រាប់អ្នកសារព័ត៌មានថា លោក ហ៊ុន ចំរើន អគ្គនាយកក្រុមហ៊ុន មង្គលលែន រៀលធី ឯ.ក និង ប្រពន្ធឈ្មោះ ឡុង មុីមុី អគ្គនាយិកា បានភូតកុហក់ពួកគាត់ដោយឲ្យរងចាំហើយរងចាំទៀតរហូតចាំរាប់ឆ្នាំនៅតែឲ្យចាំ ចង់ឲ្យពួកគាត់ចាំដូចសិលាចាំប្តីដែលគ្មានថ្ងៃវិលវិញប្រាកដណាស់ ។
លោកស្រី ឡុង មុីមុី ក៍ធ្លាប់បានសន្យាថានឹងទិញដីឡូត៍ត្រលប់ចូលមកវិញនៅក្នុងថ្ងៃទី២០ខែ១២ឆ្នាំ២០២២ តែដល់ពេលវេលាកំណត់ក៍នៅតែបន្តរព្យាយាមភូតកុហក់អូសបន្លាយពេលវេលាជិត២ឆ្នាំធ្វើឲ្យអតិថិជនកាន់តែឈឺចាប់រឹតតែខ្លាំងឡើង។
ជុំវិញនូវការចោតប្រកាន់ពីអតិថិជន២នាក់ខាងលើអង្គភាពសារព័ត៌មានយើងខ្ញុំបានទំនាក់ទំនងតាមបណ្តាញសង្គម telegram ទៅលោក ហ៊ុន ចំរើន ដើម្បីសំការស្រាយបំភ្លឺនៅវេលាម៉ោង ១៣ៈ០៦នាទីថ្ងៃទី២២ខែឧសភាឆ្នាំ២០២៣ ក្រោយលោក ហ៊ុន ចំរើន បានចូលមើលក៍បានឆ្លើយតបថា
បាទសួស្តីបង
ខាងក្រុមហ៊ុននឹងឆ្លើយតបទៅបងវិញនៅថ្ងៃស្អែកអរគុណ។
លុះស្អែកឡើងព្រឹកថ្ងៃទី២៣អង្គភាពសារព័ត៌មានយើងខ្ញុំក៍បានទំនាក់ទំនងទៅម្តងទៀតដើម្បីសំការស្រាយបំភ្លឺជៀសវាងការផ្សាយព័ត៌មានតែម្ខាងនាំឲ្យខ្វះព័ត៌មានមិនគ្រប់ជ្រុងជ្រោយ លោក ហ៊ុន ចំរើន បានចូលមើលក៍ឆ្លើយតបមកថា
សូមអធ្យាស្រ័យបង សុំបងជួយបង្ហាញកាតធ្វើការបងបន្តិចដើម្បីអោយដឹងថាមកពីស្ថាប័ន្តបត៌មានមួយណាដែរ។អរគុណបង ស្រួលខ្ញុំជម្រាបខាងថ្នាក់លើជូនបង
អង្គភាពសារព័ត៌មានយើងខ្ញុំក៍បានឆ្លើយតបវិញដែរថា
ខ្ញុំមិនអាចបង្ហាញកាតជូនតាមរយៈនេះបានទេសូម អធ្យាស្រ័យ ខ្ញុំបានប្រាប់ឈ្មោះខ្ញុំ និង អង្គភាពសារព័ត៌មានKNN រួចហើយ។
បើសិនក្រុមហ៊ុនមិនទុកចិត្តអាចមកស្នាក់ការកណ្តាលរបស់អង្គភាពសារព័ត៌មានខ្ញុំបានរៀងរាល់ម៉ោងធ្វើការ ដែលស្ថិតនៅខណ្ឌកំបូលសូមអរគុណ។
ហើយក្រុមការងារក៍បានលីងផេកជូនលោក ហ៊ុន ចំរើន ព្រោះនៅក្នុងផេកនោះមានទាំងលេខទំនាក់ទំនង និង ផែនទីបង្ហាញផ្លូវទៅស្នាក់ការកណ្តាលយ៉ាងច្បាស់។
ក្រោយមកលោក ហ៊ុន ចំរើន បានតបមកវិញថា
សួស្តីបង
ដោយសារខាងតំណាងក្រុមហ៊ុនបច្ចុប្បន្នគាត់មានធុរះរវល់ ខាងតំណាងក្រុមហ៊ុនសូមធ្វើការឆ្លើយតបទៅបងវិញនៅដើមសប្តាហ៍ថ្មីថ្ងៃ ចន្ទ ទី 29 ខែ ឧសភា ឆ្នាំ ២០២៣ ។
សូមអរគុណ
អង្គភាពសារព័ត៌មានយើងខ្ញុំបានឆ្លើយតបទៅវិញ
សូមអរគុណសម្រាប់ការឆ្លើយតប
ដោយមានការស្នើសំមកអង្គភាពយើងខ្ញុំដើម្បីធ្វើការផ្សព្វផ្សាយដូចខ្ញុំបានជំរាបជូនខាងលើ បើសិនជាខាងក្រុមហ៊ុនមានអ្វីចង់បកស្រាយបំភ្លឺនៅចំណុចណាមួយពេលដែលព័ត៌មានខ្ញុំបានចាក់ផ្សាយសូមខាងក្រុមហ៊ុន មង្គលលែន រៀលធី ឯ.ក អាចទំនាក់ទំនងមកអង្គភាពសារព័ត៌មានយើងខ្ញុំបាននៅពេលក្រោយរៀងរាល់ម៉ោងធ្វើការសូមអរគុណ។អត្ថបទ នាយភ្លុក
